रत्ननगर ‘लिजा’ र ‘एफआरए’मा जिल्लामै पहिलो, कानुनको पालना गर्दाको परिणाम : मेयर सापकोटा
रत्ननगर । रत्ननगर नगरपालिका स्थानीय तह संस्थागत क्षमता स्वमूल्याङ्कन (लिजा) र स्थानीय तह वित्तीय सुशासन जोखिम मूल्याङ्कन (एफआरए)मा जिल्लामै प्रथम भएको छ ।
संघीय मामिला तथा सामान्य प्रशासन मन्त्रालयले सार्वजनिक गरेको नतिजाअनुसार लिजामा ९९ दशमलब २५ प्रतिशत र एफआरएमा ९५ दशमलब ५ प्रतिशत अङ्क प्राप्त गरी रत्ननगर जिल्लाका सात पालिकामध्ये पहिलो हुन सफल भएको हो । रत्ननगरले आर्थिक वर्ष २०८०/८१ मा सम्पादन गरेका कामको लिजा र एफआरए दुवैमा सर्वाधिक अङ्क प्राप्त गरी जिल्लामै उत्कृष्ट बनेको हो ।
संस्थागत क्षमता स्वमूल्याङ्कन कार्यविधि, २०७७ का आधारमा सरकारले बर्सेनि स्थानीय तह, प्रदेश हुँदै संघीय मन्त्रालयमार्फत मूल्याङ्कन गर्दै आएको छ । लिजातर्फ १९ वटा सूचक र २०३ वटा उपसूचक, एफआरएतर्फ पाँचवटा सूचक र १६० वटा उपसूचक निर्धारण गरिएको छ । स्थानीय तहले लिजातर्फ शासकीय प्रबन्ध, सङ्गठन तथा प्रशासन, वार्षि...
