गुणस्तरीय सेवा र स्वास्थ्य सुरक्षामा जोड दिँदै बछौली माविको कार्यक्रम

रत्ननगर । बछौली माविमा प्राविधिक धार तर्फ होटल म्यानेजमेन्ट अध्ययनरत विद्यार्थीहरुलाई स्वास्थ्य सुरक्षा तथा गुणस्तर सुधार सम्बन्धी अभिमुखीकरण कार्यक्रम गरिएको छ । होटल म्यानेजमेन्ट तर्फ तीन वर्षे डिप्लोमा, औद्योधिक प्रशिक्षार्थी तथा १० महिने कुक तालिम दिइरहेका विद्यार्थीहरुलाई लक्षित गरी कार्यक्रम आयोजना गरिएको हो । बछौली मावि अन्तर्गत गठित नेशनल सस्टेनेबल टुरिजम क्लवले आयोजना गरेको उक्त कार्यक्रम वडा नं ६ का वडाध्यक्ष किरण महतोले उद्घाटन गरेका थिए । अध्ययन पुरा गरेपछि राजगारीको शिलसिलामा अपनाउनु पर्ने सुरक्षा, खानाको गुणस्तर सुधार र संरक्षणका बारेमा समेत विद्यार्थीलाई जानकारी दिने उद्देश्यले कार्यक्रम आयोजना गरिएको विद्यालयका अध्यक्ष राममणि खनालले जानकारी दिए । कार्यक्रममा वडाध्यक्ष महतोले सामुदायिक विद्यालयमा सुरु गरिएको प्राविधिक शिक्षाको प्रभावकारीताको लागि सरकारले सहयोग गर्नुपर्ने बताए । वडा नं ५ का वडाध्यक्ष बालकृष्ण चापागाइँले पर्यटन उद्योगमा आवश्यक पर्ने दक्ष जनशक्ति उत्पादनमा बछौली माविले ठुलो भूमिका खेलेको बताए । रेवान सौराहाका अध्यक्ष ध्रुव गिरीले बछौली माविमा उत्पादन भएका दक्ष जनशक्तिका कारण सौराहाको पर्यटन विकासमा टेवा पुगेको बताए । क्षेत्रीय होटल संघका सदस्य सुवासचन्द्र गौतमले विद्यालय स्तरबाट उत्पादित जनशक्तिले स्तरीय सेवा प्रदान गर्ने बताए । कार्यक्रममा नेथमका प्रशिक्षक सतिश मिश्रले स्वास्थ्य सुरक्षा, पाहुना सत्कार र गुणस्तर सुधार तथा निकुञ्जका रेन्जर योगेन्द्र ढकालले संरक्षण र पर्यटनको विषयमा सहजीकरण गरेका थिए । बछौली माविले २०७६ सालबाट प्राविधिक शिक्षाको होटल म्यानेजमेन्ट सुरू गरेको हो । पर्यटन उद्योग तथा औद्योगिक क्षेत्रलाई आवश्यक पर्ने दक्ष जनशक्ति उत्पादन गर्ने उद्देश्यले सञ्चालन गरिएको होटल म्यानेजमेन्टमा ३ वर्षे डिप्लोमा, २ वर्षे अप्रेन्टिसिप (औद्योगिक प्रशिक्षार्थी) र १० महिने प्रोफेसनल कुल तालिम सञ्चालन भइरहेको प्रधानाध्यापक शिवराम मरहठ्ठाले बताए । विद्यालयका अध्यक्ष खनालको अध्यक्षतामा भएको उद्घाटन कार्यक्रम क्लवका अध्यक्ष दीपेन्द्र श्रेष्ठले सञ्चालन गरेका थिए । ३ वर्षे डिप्लोमातर्फ ४० जना विद्यार्थीले अध्ययन पूरा गरी रोजगारीमा जोडिएका छन् भने सोही विषयमा हाल ६८ जना अध्ययन गरिरहेका छन् । २ वर्षे अप्रेन्टिसिप (औद्योगिक प्रशिक्षार्थी)तर्फ २०० जनाले अध्ययन गरिरहेको प्रधानाध्यापक मरहठ्ठाले जानकारी दिए । १० महिने प्रोफेसनल कुल तालिमतर्फ १०० जनामध्ये ८० जना सीप परीक्षणमा उत्तीर्ण भएर स्वदेश तथा विदेशमा रोजगारी गरिरहेका छन् । बछौली माविमा होटल म्यानेजमेन्टमा अध्ययन गरिरहेका विद्यार्थीहरुलाई सौराहा, पोखराका होटलहरुमा प्राक्टिकल गराउँदै आइएको छ ।