क्यान्सर पीडित बालकको उपचारका लागि लायन्स चितवन इस्टको आर्थिक

असार १७ गते । लायन्स क्लब अफ चितवन इस्टले खैरहनीका क्यान्सर पीडित बालकको उपचारका लागि आर्थिक सहयोग गरेको छ । खैरहनी ८, पर्सा निवासी ४ वर्षे रक्त क्यान्सरबाट पीडित दिप्सन दुवाडीलाई लायन्स क्लब चितवन इस्टले ३३ हजार १०८ रुपैयाँ सहयोग गरेको हो । क्लबका अध्यक्ष अर्जुन लम्सालले आफ्नो लायन वर्ष २०२५/०२६ को कार्यकाल आर्थिक सहयोग हस्तान्तरण गरी शुभारम्भ गरेका हुन् । आर्थिक अभावका कारण उपचारमा कठिनाई भएको अवस्थालाई मध्यनजर गर्दै उपचारमा केही सहज होस भन्ने भावनाले लायन्स इस्टका सदस्यहरुसंग स्वेच्छिक रकम सङ्कलन गरी दिप्सनका अभिभावक लक्ष्मण दुवाडीलाई हस्तान्तरण गरिएको अध्यक्ष लम्सालले बताए । रकम हस्तान्तरणमा लायन्स डिस्ट्रिक्टका पदाधिकारी तथा समाजसेवीहरू बुद्धिराज डल्लाकोटी,ज्ञानबहादुर बिसुराल तथा रक्की खरेलले लायन्सको सेवा कार्यको चर्चा गर्दै दिप्सनको शीघ्र स्वास्थ्य लाभको कामना गरे । उपस्थितहरुले यस प्रकारको जटिल समस्यामा विपन्नहरूको लागि राज्यले सकृयता देखाउनु पर्नेमा जोड दिए । कार्यक्रम क्लबका अध्यक्ष अर्जुन लम्सालको अध्यक्षतामा भएको कार्यक्रम सचिव राम खड्काले सञ्चालन गरेका थिए ।