सकियो तीन महिने कम्प्युटर तथा लेखा तालिम

रत्ननगर । सौराहा सामुदायिक पुस्तकालयमा आयोजना गरिएको तीन महिने आधारभूत कम्प्युटर तथा लेखा तालिम सोमबार सकिएको छ । रत्ननगर नगरपालिकाको आर्थिक सहयोगमा सुचना प्रविधि मार्फत युवाहरुमा रोजगारी र्सिजना गर्न तालिम आयोजना गरिएको हो । पुस्तकालयमा गरिएको समापन कार्यक्रममा वडा नं ५ का वडाध्यक्ष बालकृष्ण चापागाईँ, पुस्तकालयका अध्यक्ष ज्ञानेन्द्रकुमार विष्ट, कार्यपालिका सदस्य बविता चौधरी लगायतले तालिममा सहभागीहरुलाई प्रमाणपत्र हस्तान्तरण गरेका थिए । तालिममा सहभागी ३४ जना मध्ये तीन जनालाई उत्कृष्टता घोषणा गरिएको छ । अन्जना मुसहर प्रथम, मीना घिमिरे द्धितीय र अनिता पौडेललाई तृतीय घोषणा गरी नगर पुरस्कार प्रदान गरिएको छ । उनीहरुलाई आयोजक संस्था सौराहा सामुदायिक पुस्तकालय र वडा नं ६ का वडा सदस्य गोपी विडारीले नगद पुरस्कार प्रदान गरेका छन् । पुस्तकालयका अध्यक्ष विष्टले पुस्तकालले सीप विकास र आयआर्जनको काम समेग गर्दै आएको भन्दै युवाहरुमा प्रविधि सिकाएर आत्मनिर्भर बनाउने योजना रहेको बताए । कार्यपालिका सदस्य बविता चौधरीले सुचना प्रविधिलाई आत्मसाथ गर्न सके जीवन सहज हुने भन्दै सीकेको सीपलाई जीवनको आधार बनाउन आग्रह गरिन । कार्यक्रमका प्रमुख अतिथि वडाध्यक्ष चापागाईँले प्रविधिको प्रयोगले मात्र जीवन सार्थक हुने विचार व्यक्त गरे । तालिमको प्रशिक्षकमा मुक्ति शर्मा रहेका थिए । कार्यक्रममा झुवानी सामुदायिक पुस्तकालयका अध्यक्ष अनिल अर्याल, वडा नं ७ का वडासदस्य कुलप्रसाद आचार्य, वडा नं ६ की वडा सदस्य केशरीमाया सुनार, सामाजिक व्यक्तित्व गोविन्द अधिकारी, सहभागीको तर्फबाट अन्जना मुसहर लगायतले मन्तव्य राखेका थिए । कार्यक्रममा वडा सदस्य वीरेन्द्र महतो,ग्रिन सोसाइटी नेपालका महासचिव शिरलाल परियार लगायतको उपस्थिति रहेको थियो । पुस्तकालयकी व्यवस्थापक लक्ष्मी विडारीले सञ्चालन गरेको उक्त कार्यक्रममा पुस्तकालय व्यवस्थापन समितिकी सदस्य लीलादेवी चापागाईले स्वागत मन्तव्य राखेकी थिइन् ।