कर्णालीमा इन्धनबाट चल्ने गाडीसँग प्रतिस्पर्धा गर्दै विद्युतीय गाडी

कर्णाली | कर्णालीमा पछिल्लो समय सार्वजनिक यातायातका रुपमा विद्युतीय सवारीको प्रयोग बढ्दै गएको छ ।  पेट्रोलियम पदार्थबाट चल्ने सवारीको चाप हुने कर्णालीका सडकमा अहिले विद्युतिय सवारीले अड्डा जमाउन थालेको छन् । कर्णालीका प्रायः जिल्लाहरूमा पुग्ने पेट्रोलियम पदार्थबाट चल्ने सवारीको सामाज्यलाई अहिले भने विजुलीबाट चल्ने सवारीले कडा टक्कर दिइरहेका छन् । विद्युती सवारीहरू अचेल कर्णालीका पहाडी जिल्लाहरूमा दैनिक पुगिरहेका छन् ।

प्रायः निजी प्रयोजनका लागि प्रयोग गरिँदै आएका विद्युतीय सवारीहरू पछिल्ला वर्षमा सार्वजनिक यातायातमा भित्रिने संख्या बढ्दो छ । कर्णाली प्रवेश गर्ने मुख्य स्थलमार्ग नेपालगञ्ज–सुर्खेत रुटमा दैनिक छिटपुट सञ्चालन हुने विद्युतीय सवारीहरू अहिले सुर्खेतबाट पहाडी जिल्ला दैलेख, जाजरकोट सदरमुकाम तथा रुकुम पश्चिममासमेत सञ्चालन आउन थालेका छन् ।

११ देखि १७ सिट क्षमताका साना सवारीहरू नियमित रुपमा पहाडी भेगमा सञ्चालन भइरहेको यातायात व्यवसायी बताउँछन् । सुर्खेत सदरमुकाम वीरेन्द्रनगरमा मात्रै सार्वजनिक सवारीका रुपमा प्रयोग गरिने विद्युतीय सवारीको संख्या ५० बढी छ । नेपालगञ्जबाट मात्र दैनिक ३० बढी सवारी वीरेन्द्रनगर आएर फर्किने गरेका छन् । कालोपत्रे गरिएका सडकहरूमा सञ्चालनमा कुनै समस्या नहुने भएकाले डिजेल गाडीको विकल्पका रुपमा विद्युतीय सवारीहरूमा व्यवसायीको आकर्षण बढेको छ ।

आर्थिक र वातावरणीय रुपमा राम्रो देखिएपछि डिजेल गाडीलाई विस्तारै विद्युतीय गाडीले विस्थापित गरिरहेको छ । ‘डिजेल सवारीभन्दा विद्युतीय सवारीमा यात्रा गर्दाको अनुभूति नै बेग्लै छ,’ एक यात्रु धनराज रावलले भने, ‘डिजेलबाट चल्ने गाडीमा यात्रा गर्दा गन्ध आउने र ठूलो आवाजले कष्टकर जस्तै यात्रा लाग्थ्यो । तर विद्युतीय सवारीमा आवाज नआउने र शान्त रुपमा यात्रा गर्दा मनै प्रफूलित बनाउने रहेछ ।’

विद्युतीय सवारीमा पेट्रोल पम्पबाट डिजेल–पेट्रोल हाले जस्तै चार्जिङ स्टेसनबाट विद्युत चार्ज गर्नुपर्छ । हाल बजारमा उपलब्ध आधुनिक विद्युतीय गाडी एकपटक पूर्ण चार्ज गरेपछि करिब ६ सय ४० किलोमिट चल्ने गरेको व्यवसायीहरू बताउँछन् । विद्युतीय सवारीका सञ्चालनमा सहजतका लागि चार्जिङ स्टेसन, सर्भिसिङ सेन्टर लगायत पूर्वाधारको विकास गरिएको छ । नेपाल विद्युत प्राविधिकरणले कर्णालीका सुर्खेत, दैलेख र जाजरकोटमा फास्ट चार्जिङ स्टेसन निर्माण गरिदिएको छ । यद्यपि यो पर्याप्त भने नरहेको व्यवसायीहरू बताउँछन् । विद्युतीय सवारीको संख्या बढे पनि भाडादर भने डिजेल गाडीकै सरह छ । विद्युतीय सवारीलाई एक पटक चार्ज गरेपछि झण्डै ६ सय किलोमिटरसम्म गुड्छ । डिजेलबाट चल्ने गाडीले लिइरहेकै भाडा विद्युतीय सवारीले पनि यात्रुबाट लिइरहेका छन् ।