१
Advertisement
भरतपुर । भरतपुर महानगरपालिकाले हालसम्म ९२३ छोरीको जीवन बिमा गरिदिएको छ । महानगरको २०७९ जेठ ११ गतेको निर्णय र भरतपुर महानगरपालिका छोरी जीवन बिमा गर्नेसम्बन्धी कार्यविधि, २०७९ (प्रथम संशोधन २०७९) अनुसार महानगरले छोरीहरुको जीवन बिमा गरिदिएको हो । चालू आव २०८१/८२ को हालसम्म ८० जना छोरीको जीवन बिमा भइसकेको महानगरले जनाएको छ । छोरी जीवन बिमासम्बन्धी पहिलो कार्यविधि २०७९ असार ३१ गते प्रमाणीकरण भएको थियो । संशोधित कार्यविधि २०७९ माघ २९ गते प्रमाणीकरण भई कार्यान्वयन भएको हो ।
महानगरभित्र स्थायीरुपमा बसोवास गर्ने र सरकारी स्वास्थ्य संस्थाबाट प्रसूति सेवा लिएकी आमाले छोरी जन्माए ती छोरीको महानगरले जीवन बिमा गरिदिने गरेको छ । छोरी जीवन बिमाका लागि बुबाआमाले आवश्यक प्रक्रिया पूरा गरी निवेदन दिनुपर्ने महानगरको महिला, बालबालिका तथा समाजकल्याण शाखाकी वरिष्ठ महिला विकास अधिकृत एवं जीवन बिमा कार्यान्वयन समितिकी सदस्यसचिव सुशीला वाग्लेले बताइन् ।
छोरी जन्मिएको ९० दिनभित्र सम्बन्धित स्वास्थ्य संस्थाले दिएको जन्म प्रमाणपत्र, जन्मदर्ता, छोरीको पासपोर्ट साइजको फोटो, वडाको सिफारिस, बुबाआमाको विवाहदर्ता, नागरिकताको प्रतिलिपि र महानगरमा स्थायी बसोवास गरेको खुल्ने प्रमाण संलग्न गरी निवेदन दिनुपर्ने उनले बताइन् ।
यसरी प्राप्त हुन आएका निवेदनमाथि बिमा कार्यान्वयन समितिले छानबिन गर्ने छ । नगरप्रमुखको संयोजकत्वमा आठ सदस्यीय छोरी बिमा कार्यान्वयन समिति रहने व्यवस्था छ । मनासिव देखिएको निवेदन उपर समितिले बिमा गरिदिने निर्णय गर्ने छ भने बिमा प्रिमियमबापत हरेक वर्ष दिनुपर्ने रकम महानगरले बिमा कम्पनीलाई उपलब्ध गराउने उनले जानकारी दिइन् । उनका अनुसार राष्ट्रिय बिमा कम्पनीमा ५० हजार रूपैयाँको १५ वर्षे अवधिको जीवन बिमा गर्न महानगरले प्रिमियम रकम दिने छ ।
छोरी जीवन बिमाको प्रिमियम रकमबापत महानगरले बर्सेनि तीन हजार ३१७ रूपैयाँ बिमा कम्पनीलाई उपलब्ध गराउने सहायक महिला विकास निरीक्षक निमा खड्काले बताइन् । ‘एउटा छोरीको जीवन बिमाका लागि महानगरले १५ वर्षसम्म जम्मा ५० हजार तिरिदिन्छ । त्यसमा बिमा कम्पनीले बोनस थप गरेर जम्मा एक लाख रूपैयाँ दिन्छ । उक्त रकममा करकट्टी हुन सक्छ’, उनले भनिन् ।
महानगरको नगरप्रमुखमा दोस्रोपटक निर्वाचित भएपछि पदभार ग्रहण गर्ने क्रममा रेनु दाहालले छोरीहरुको जीवन बिमा गरिदिने पहिलो निर्णय गरेकी थिइन् ।
नेपाली भाषाको यो पोर्टलले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषणलाई समेट्छ | हाम्रो खबर नेपाल
ले मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष र भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोस श्रोत गोप्य राखिने छ ।
