रत्ननगर–१२ का प्रकृतिलाई उच्च शिक्षाका लागि स्कुटर प्रदान

रत्ननगर । शारीरिकरूपमा अशक्तता भई हिँडडुल गर्न नसक्ने तथा कमजोर आर्थिक अवस्थाका कारण उच्च शिक्षा अध्ययन गर्ने सपना पूरा गर्न नसकेकी रत्ननगर–१२ का प्रकृति देवकोटालाई रत्ननगर नगरपालिकाले सहयोग गरेको छ ।

कम्मरभन्दा तलको भागले टेक्न नसक्ने शारीरिक समस्या भएकी उनको स्नातक अध्ययन गर्ने सपना नगरपालिकाले पूरा गरिदिने भएको छ । सोमबार रत्ननगर नगरपालिकाका मेयर प्रलाद सापकोटाले चारपाङ्ग्रे स्कुटर हस्तान्तरण गर्दै उनको बाँकी शैक्षिक यात्राका लागि सहयोग गर्ने प्रतिबद्धता व्यक्त गरेका छन् ।

‘रत्ननगरमा आर्थिक अभावका कारण पढ्नबाट कोही पनि वन्चित हुनु पर्दैन’, उनले भने, नगरपालिकाले अभिभावकत्व ग्रहण गर्ने प्रकृतिजस्तै विद्यार्थीहरुका लागि हो ।’ शहीद स्मृति बहुमुखी क्याम्पससम्म जान आउन सहज होस् भनेर चारपाङ्ग्रे स्कुटर प्रदान गरिएको र उनका लागि आवश्यक शैक्षिक शुल्क, स्टेसनरी लगायतका सामग्रीको लागि पनि नगरपालिकाले सहयोग गर्ने र स्नातक उत्तीर्णपश्चात् जागिरको प्रबन्ध गर्नसमेत आफू प्रतिबद्ध रहेको मेयर सापकोटाले बताए ।

रत्ननगरको न्यू क्यापिटल कलेजबाट चार वर्षअघि १२ कक्षा उत्तीर्ण गरेकी देवकोटाको शैक्षिक यात्रा आर्थिक अभावका कारण बीचैमा रोकिएको थियो । वृद्ध बुबासँग रत्ननगर–१२ मा बस्दै आएकी उनको बारेमा रत्ननगरको विभिन्न विषयगत समितिले घरमै पुगेर स्थलगत अध्ययनसमेत गरेको थियो ।

प्रकृति साहित्य सिर्जना र अतिरिक्त क्रियाकलापमा समेत अब्बल रहेकी छन् । उनले अवरुद्ध भएको शैक्षिक यात्रा अगाडि बढाउन सिंगो नगरपालिका र मेयर सापकोटा अभिभावक बनेर सहयोग गरेकोमा आभार व्यक्त गर्दै लगानी खेर जान नदिने बताएकी छन् । भविष्यमा लोकसेवा उत्तीर्ण गरी राष्ट्रसेवक कर्मचारी बन्ने र आफूजस्तै शारीरिक अपाङ्गता भएकाहरुलाई सहयोग गर्न इच्छा रहेको उनी बताउँछिन् ।

महिला, बालबालिका तथा ज्येष्ठ नागरिक शाखाका प्रमुख एवं महिला विकास अधिकृत दीपा घिमिरे शर्माले आर्थिक अभावका कारण उच्च शिक्षा हासिल गर्नबाट वन्चित छात्रछात्रालाई विगतमा पनि ह्वीलचियर, ट्राइसाइकल र चारपाङ्ग्रे स्कुटर प्रदान गरिँदै आएको बताइन् ।

कार्यक्रममा उपमेयर यादवप्रसाद पाठक, विज्ञ सल्लाहकार रामहरि न्यौपाने, प्रशासन शाखा प्रमुख सबिता अर्याल, महिला विकास निरीक्षक रन्जना पौडेललगायत कर्मचारीहरुको सहभागिता रहेको थियो ।