स्वदेशमै समृद्धि खोज्दै: विदेश फर्केका चापागाईँको कागती खेती

नवलपुरको सिङ्चाङमा ८० रोपनीमा कागती खेती गर्दै आएका दीपक चापागाईँले मलेसियाबाट फर्किएपछि कृषिमा भविष्य देखेका छन्। पाँच वर्षअघि सुरु गरिएको खेतीले अहिले राम्रै उत्पादन दिन थालेको छ। यो वर्ष मात्र ५० क्विन्टल कागती बजारमा पठाइसकेका छन् भने ५ सय क्विन्टल उत्पादन हुने अनुमान छ।

चापागाईँ र देवीप्रसाद भुसालले सफल कृषि फार्ममार्फत खेती विस्तार गर्दै आएका छन्। गाउँका अन्य किसान पनि प्रेरित भई कागती खेतीमा लागेका छन्। कागती खेतीले गाउँमा रोजगारी पनि बढाएको छ।

हाल नवलपुरमा १५० किसानले ५० हजारभन्दा बढी बिरुवा लगाएका छन्। जिल्ला कृषि कार्यालयले अनुदान, औषधि र नर्सरी सहयोग गर्दै आएको छ। तर, किसानले उचित बजारको अभाव रहेको गुनासो गरेका छन्।