चितवनमा विश्व रक्तदाता दिवस : १,७१७ जनाले रक्तदान गरी बनाए राष्ट्रिय रेकर्ड

चितवन, ३१ जेठ । ब्लड डोनर्स सोसाइटी चितवनले विश्व रक्तदाता दिवस २०२५ को अवसरमा शनिबार भरतपुरस्थित उद्योग सङ्घको प्रदर्शनी केन्द्रमा रक्तदान महोत्सव आयोजना गरेको छ । रगतको अभावले उपचारमा कठिनाइ भइरहेको अवस्थामा आयोजित यो महोत्सवमा १,७१७ जनाले रक्तदान गरेका छन् ।

कार्यक्रमको उद्घाटन भरतपुर महानगरपालिकाकी प्रमुख रेनु दाहालले एक समारोहबीच गरिन् । बिहान ७ बजेदेखि बेलुकीसम्म चलेको रक्तदान कार्यक्रममा रत्ननगर क्षेत्रबाट मात्रै करिब ५०० जनाले रक्तदान गरेको ब्लड डोनर्स सोसाइटी रत्ननगरका अध्यक्ष रमेश नेपालले जानकारी दिए । रक्तदान महोत्सवले एकै दिनमा एकै ठाउँमा सञ्चालित रक्तदान कार्यक्रममध्ये नेपालकै सर्वाधिक रगत संकलन गर्दै राष्ट्रिय रेकर्ड समेत कायम गरेको उनले दावी गरे ।

मेयर दाहालले चितवन अस्पतालहरूको केन्द्र बन्दै गएको सन्दर्भमा यस्ता महोत्सवले रगतको अभाव समाधान गर्न महत्वपूर्ण भूमिका खेल्ने विश्वास व्यक्त गरिन् । उनले भनिन्, “रक्तदान मानव जीवनको महत्वपूर्ण कार्य हो, जसले कसैको ज्यान बचाउन सक्छ । रक्तदातालाई प्रोत्साहन गर्न जरुरी छ ।”

जिल्ला समन्वय समिति चितवनका प्रमुख नारायणप्रसाद अधिकारीले नयाँ रक्तदातालाई प्रेरित गर्न र रक्तदानबारे समाजमा रहेको भ्रम हटाउन युवाहरूलाई जागरुक बनाउनुपर्ने बताए । ब्लड डोनर्स सोसाइटी चितवनका अध्यक्ष अर्जुन अधिकारीले ‘एक घर, एक रक्तदाता’ अभियानमार्फत रक्तदाताको सङ्ख्या बढाउने प्रयास भइरहेको जनाए ।

महोत्सवमा १,५०० युनिट रगत सङ्कलन गर्ने लक्ष्य राखिएकोमा सोभन्दा बढी रगत सङ्कलन भएकोमा आयोजकले सबै रक्तदातालाई धन्यवाद दिए । कार्यक्रममा १०० भन्दा बढी पटक रक्तदान गर्ने रक्तदातालाई सम्मान गरिएको थियो ।

सोसाइटीका अनुसार चितवनका अस्पतालमा दैनिक १५० युनिट रगतको माग छ, तर प्रादेशिक रक्तसञ्चार केन्द्रमा औसतमा ३०–४० युनिट मात्र उपलब्ध हुन्छ । यो महोत्सवले रगतको माग र आपूर्तिबीचको खाडल कम गर्न महत्वपूर्ण योगदान पुर्‍याएको छ ।

रक्तदानप्रति जनचेतना फैलाउन र नयाँ रक्तदातालाई प्रोत्साहित गर्न यो कार्यक्रमले सकारात्मक सन्देश प्रवाह गरेको छ । ब्लड डोनर्स सोसाइटीले आगामी दिनमा पनि यस्ता अभियानलाई निरन्तरता दिंदै रगतको नियमित आपूर्ति सुनिश्चित गर्ने प्रतिबद्धता जनाएको छ ।