शान्तिकुञ्जको १७औं स्थापना दिवस : रक्तदान र सहकारी शिक्षा

रत्ननगर । रत्ननगर वडा नं १२ स्थित शान्तिकुञ्ज सामाजिक उद्यमी महिला सहकारी संस्थाको १७औं स्थापना दिवसको अबसरमा रक्तदान तथा सहकारी शिक्षा कार्यक्रम गरिएको छ । दिवसको अबसरमा जेठ १५ र १६ गते शेयर सदस्यहरुका लागि सहकारी शिक्षा सम्बन्धी प्रशिक्षण कार्यक्रम गरेको सो सहकारीले शनिबार सामाजिक उत्तरदायित्व बहन गर्दै रक्तदान कार्यक्रम आयोजना गरेको हो । रत्ननगर नगरपालिका वडा नं १२ का वडाध्यक्ष सुन्दरमणि सुवेदी प्रमुख अतिथि रहेको सो कार्यक्रममा ३६ युनिट रगत संकलन भएको छ । कार्यक्रममा १७ जना महिला सहित ३६ जनाले रक्तदान गरेको संस्थाकी अध्यक्ष निर्मला दंगालले जानकारी दिइन् । सो अबसरमा वडाध्यक्ष सुवेदीले महिलाहरुले सञ्चालन गरेको उद्यमी सहकारीले स्थानीय स्तरमा आर्थिक विकास र महिलाहरुलाई उद्यमी बनाउन महत्वपूर्ण भूमिका निर्बाह गरेको बताए । शान्तिकुञ्जले सुरु गरेको उद्योगको रुपमा दुध संकलन र त्यसको विविधिकरणको काम उदाहरणीय रहेको उनको भनाई छ । कार्यक्रममा संस्थाकी संस्थापक तथा सेवा नेपालकी संस्थापक अध्यक्ष पार्वती न्यौपानेले ग्रामिण क्षेत्रका महिलाहरुलाई उद्यमी बनाउन र दुधको विविधिकरणमा शान्तिकुञ्जले रचनात्मक काम गरिरहेको भन्दै तीनै तहका सरकारले उद्यमी सहकारीहरुलाई अनुदान दिनुपर्ने बताइन् । किसानलाई रासायनिक मल, दाना चोकर विक्री गर्दै आएको सो सहकारीले आर्थिक कारोबारसंगै दुध संकलन र विविधिकरणको काम गरिरहेको छ । संस्थाकी अध्यक्ष दंगालले प्रदेश सरकारको २५ लाख अनुदानले शान्तिकुञ्ज डेरी उद्योगको रुपमा ब्राडिङ, लेभलिङ र प्याकेजिङ गरी बजारमा पठाउन सुरु गरिएको बताइन् । दुधको विविधिकरण गरी दही, खुवा, पनिर र कुल्र्फी बनाएर विगत दुई बर्ष देखि बजारमा पठाउदै आएको भन्दै संस्थाकी उपाध्यक्ष दुर्गाकुमारी बरालले शेयर सदस्यहरुबाट दुध संकलन गरी विविधिकरण र बजारीकरणको काम चलिरहेको बताइन् । एक हजार १३५ शेयर सदस्य रहेको सो सहकारीको शेयर पूजिँ एक करोड ३३ लाख, जगेडा कोषमा ८७ लाख १६ हजार, बचत संकलन ८ करोड ७० लाख १९ हजार, ऋण लगानी ७ करोड ३७ लाख ३२ हजार र कुल कारोबार ११ करोड ३६ लाख ९२ हजार रहेको संस्थाकी व्यवस्थापक शुशीला खनालले जानकारी दिइन् । संस्थाले ४१८ जना शेयर सदस्यहरुलाई ऋण लगानी गरेको छ । संस्थाकी उपाध्यक्ष बरालले स्वागत मन्तव्य राखेको रक्तदान उद्घाटन कार्यक्रममा पञ्चकन्या रेडक्रसका सभापति अर्जुन पौडेल, अग्रज महिला विकास साकोसकी कार्यबहाक अध्यक्ष पम्फा अर्याल, पञ्चकन्या आमा समुहकी उपाध्यक्ष मीना दुवाडी, सरसफाई अभियान्ता ज्ञानेन्द्रराज पाण्डे लगायतको उपस्थिति रहेको थियो । कार्यक्रम संस्थाकी सचिव सम्झना घिमिरेले सञ्चालन गरेकी थिइन् । दिवसको अबसरमा सो सहकारीले करिब २०० शेयर सदस्यहरुलाई सहकारी शिक्षा प्रदान गरेको छ । सेवा नेपाल, हेफर इन्टरनेशनल नेपाल र राष्ट्रिय सहकारी महासंघसंगको सहकार्यमा उक्त कार्यक्रम गरिएको सचिव लामिछानेले जानकारी दिइन् ।