गायत्री हरिहर मन्दिरमा महायज्ञको आयव्याय सार्वजनिक

रत्ननगर । रत्ननगर नगरपालिका वडा नं १ निपनी स्थित गायत्री हरिहर मन्दिरमा आयोजना गरिएको श्रीमद् भागवत महापुराण तथा धनधान्याञ्चल ज्ञान महायज्ञको आयव्याय सार्वजनिक गरिएको छ । महायज्ञ मुल समारोह समितिले शुक्रबार पत्रकार सम्मेलनको आयोजना गरी महायज्ञमा संकलन भएको रकम र खर्चको विवरण सार्वजनिक गरेको हो । गत मंसिर २४ गते सुरु भइ पुस १ गते सम्पन्न भएको महायज्ञमा ४७ लाख ६१ हजार २६० रुपैया संकलन भएको महायज्ञ मुल समारोह समितिका संयोजक रुपनराज घिमिरेले जानकारी दिए । महायज्ञमा ४७ लाख ६१ हजार २६० रुपैया संकलन भएको र १० लाख ८६ हजार ३६४ रुपैया खर्च कटाएर ३६ लाख ७४ हजार ८९६ रुपैया बचत गर्न सफल भएको संयोजक घिमिरेले जानकारी दिए । महायज्ञमा गायत्री मन्दिर तर्फ ३१ लाख २२ हजार ८८ रुपैया, गायत्री गुरुकुलम तर्फ १२ लाख ६६ हजार ८७२ रुपैया र हरिहर सदन(धर्मशाला) तर्फ ३ लाख ७१ हजार ३०० रुपैया संकलन भएको थियो । गायत्री मन्दिर तर्फ संकलन भएको ३१ लाख २२ हजार ८८ रुपैया मध्ये ५५ हजार ५५५ रुपैया अक्षक कोषमा र ३ लाख ९० हजार ५०० रुपैया धान विक्रीबाट आम्दानी भएको संयोजक घिमिरेले बताए । गायत्री हरिहर मन्दिर संरक्षण, गुरुकुलम सञ्चालन र धर्मशाला निर्माणको लागि रमक जुटाउन महायज्ञ आयोजना गरिएको हो । पत्रकार सम्मेलनमा मन्दिर संरक्षण समितिका कार्यबहाक अध्यक्ष शंकर गिरीले महायज्ञबाट संकलित रकम उद्देश्य मुताविक खर्च गरिने बताए । गायत्री हरिहर मन्दिरलाई धार्मिक पर्यटकीय स्थलको रुपमा विकास गर्न धर्मशाला निर्माण गरिएको भन्दै उनले गुरुकुलम र धर्मशाला हरिहर मन्दिरको प्रमुख आर्कषण गरेको बताए । महायज्ञ मुल समारोह समितिकी सचिव ऋतु गिरीले सञ्चालन गरेको सो कार्यक्रममा महायज्ञमा आर्थिक, भौतिक र सामाजिक रुपमा सहयोग गर्ने एकदर्जन महानुभावहरुलाई सम्मान गरिएको थियो । महायज्ञ मुल समारोह समितिका संयोजक घिमिरेको अध्यक्षतामा भएको कार्यक्रममा वडा सदस्य उमादेवी पौडेल, मन्दिर संरक्षण समितिका निर्वतमान अध्यक्ष नेमराज शर्मा पौडेल सहित वर्तमान समितिका पदाधिकारी तथा सदस्य र मुल समारोह समितिका पदाधिकारी तथा सदस्यहरु उपस्थित थिए ।