दोस्रो मनहरी कप फुटबल प्रतियोगिता, उद्घाटन खेलमा नमोबुद्द सफल

मनहरी । चैनपुर जेसीज मनहरीको आयोजनामा दोस्रो मनहरी कप फुटबल प्रतियोगिता शुक्रवार देखि सुरु भएको छ । मनहरी गाउँपालिकाको ४ नम्बर वडाको मुख्य प्रायोजन रहेको उक्त प्रतियोगिता मंसिर ३ गते सम्म संचालित हुने छ ।

गाउँपालिकाको ४ नम्बर वडास्थित मसिनेको गोलघर खेल मैदानमा आयोजित उक्त प्रतियोगितामा जिल्लाका १६ वटा टिमको सहभागिता रहेको छ । उद्घाटन कार्यक्रमलाई सम्बोधन गर्दै मनहरी गाउँपालिकाका अध्यक्ष रञ्जन कालाखेतीले पालिकाले खेल क्षेत्रमा सक्दो लगानी गर्दै आएकोले आगामी दिनमा अझै योजनाबद्ध भएर काम गर्ने धारणा राखे ।

प्रतियोगिताको उद्घाटन खेलमा हेटौंडा १३ पदमपोखरीको नमोबुद्ध एफसीले विजय यात्रा सुरु गरेको छ । उद्घाटन खेलमा मनहरी ४ नम्बर वडालाई २–० ले हराउँदै नमोबुद्धले विजय यात्रा सुरु गरेको हो । २६ औं मिनेटमा सुनिल लामाले गोल गर्दै नमोबुद्धलाई अग्रता दिलाएका थिए । ४३ औं मिनेटमा सामुयल सुनारले अग्रता दोब्बर बनाए । मनहरी ४ ले गोल गर्ने केही मौका पाएपनि सदुपयोग गर्न नसक्दा पहिलो खेलबाटै बाहिरिएको छ ।

खेलको म्यान अफ द म्याच नमोबुद्धका सामुयल सुनार नै घोषित भए । उनले विभिन्न पुरस्कार प्राप्त गरे । जारी प्रतियोगितामा शनिबार हाँडीखोला यूथ क्लव र जनसिद्ध क्लवको बीचमा खेल हुने प्रतियोगिताका सहसंयोजक उज्वल विष्टले जानकारी दिए । मंसिर ३ गतेसम्म सञ्चालन हुने प्रतियोगितामा जिल्लाका १६ वटा टिमको सहभागिता रहेको छ । प्रतियोगिताको विजेताले एकलाख एकहजार १११ रुपैयाँ र उपविजेताले ५१ हजार १५१ रुपैयाँ नगदसहित ट्रफी प्राप्त गर्नेछन् । सर्वोत्कृष्ट खेलाडीले ७ हजार ५ सय रुपैयाँ र अन्य विधागत उत्कृष्टले जनही ३ हजार ५ सय रुपैयाँसहित ट्रफी प्राप्त गर्ने अर्का सहसंयोजक प्रदीप थापाले जानकारी दिए ।