रत्ननगरका जनप्रतिनिधि र कर्मचारीबीच अन्तरसंवाद

रत्ननगर । रत्ननगर नगरपालिका सार्वजनिक सेवा प्रवाह तथा क्षमता विकास समितिको आयोजनामा शुभदीपावली, छठपर्व तथा नेपाल सम्वतको अवसरमा जनप्रतिनिधि र कर्मचारीबीच शुभकामना आदानप्रदान तथा अन्तरसंवाद कार्यक्रम सम्पन्न भएको छ ।

कार्यक्रमका प्रमुखअतिथि नगरप्रमुख प्रलाद सापकोटाले समयमै काम सम्पन्न गर्न कर्मचारीलाई निर्देशन दिँदै कर प्रशासनलाई अझै मजबुत बनाउन आग्रह गरे । नगरको सेवा प्रवाहका कारण लिजामा मूल्याङ्कनमा नेपालभरकै नगरपालिकामा तेस्रो स्थान हासिल गर्न सफल भएकोमा सबैमा आभार व्यक्त गर्दै कर्मचारीहरुको समस्याहरुको सम्बोधन गर्नेगरी अन्तरर्किया गर्ने बताए ।

यस्तै, विशिष्ट अतिथि उपप्रमुख यादवप्रसाद पाठकले लिजाको रिजल्टले जनप्रतिनिधि र कर्मचारीबीच समन्वय भइरहेको पुष्टि गरेको बताउँदै हुनसक्ने काम समयमै पूरा गर्ने र नहुने काम यो कारणले हुँदैन भनेर सेवाग्राहीलाई बुझाउन आग्रह गरे । उनले विधि र ऐनलाई कार्यान्वयनका गरेर अगाडि बढ्नुपर्नेमा जोड दिँदै गत वर्ष गरेको भन्दा अब्बल काम गर्न कर्मचारीहरुलाई आग्रह गरे ।

कार्यक्रममा लेखा शाखा प्रमुख एवं लेखा अधिकृत कृष्णप्रसाद सुवेदीले काम गर्दै जाँदा प्राविधिक त्रुटि हुनसक्ने भन्दै त्यसलाई सच्चाएर अगाडि बढ्ने प्रतिबद्धता व्यक्त गरे । उनले लोभ, लालच र घाक–धम्कीबाट प्रभावित नभई आपनो काम कर्तव्य र अधिकार बमोजिम सेवा गरिहेको जिकिर गरे ।

गत आर्थिक वर्षमा ८० प्रतिशतको हाराहारीमा बजेट खर्च भएको र कर्मचारीले सामूहिक भावनाले काम गरिरहेको बताउँदै सोहेन्द्रराज खरेललाई ध्यानाकर्षण गराउँदै कर्मचारीलाई इन्सेन्टिभको व्यवस्था गर्न माग गरे ।

यस्तै, वडा नं–६ का वडा सदस्य वीरेन्द्र महतोले नगरले लिएको लक्ष्यमा पुग्न जनप्रतिनिधि र कर्मचारीबीच समन्वय र सहकार्य गरेर अगाडि बढ्नुपर्ने बताए । उनले प्रविधिको विकाससँगै सफ्टवेयरमार्फत दर्ता चलानीको व्यवस्था गरी सेवाग्राहीको कुन फाइल कुन शाखामा छ भन्ने जानकारी गराउन सुझाव दिए ।

नगरप्रवक्ता कुलप्रसाद सापकोटा रूर स्वास्थ्य शाखा प्रमुख माघवप्रसाद पौडेलले सामूहिक भावनाका साथ काम गर्न सकिए सेवाग्राहीलाई प्रभावकारीरुपमा सेवा प्रवाह गर्न सकिने बताए ।

यसैगरी, प्रमुख प्रशासकीय अधिकृत सुकदेव लम्सालले नगरपालिकामा पृथक ढङ्गले कसैलाई नहेरेको बताउँदै करार कर्मचारी र लोकसेवा कर्मचारीको सेवासुविधामा केही भिन्नता रहेकाले त्यसलाई सहजरूपमा लिनुपर्ने बताए ।

सार्वजनिक सेवा प्रवाह तथा क्षमता विकास समितिका संयोजक सोहेन्द्रराज खरेलले कर्मचारीका समस्या न्यूनीकरण गर्न आफूले अपेक्षा गरेको कुरा समितिमा राख्न आग्रह गरे । उनले सार्वजनिक सेवालाई चुस्त र दुरुस्त बनाउने र संस्थागत क्षमता विकासका निम्ति काम गर्ने प्रतिबद्धता व्यक्त गर्दै कर्मचारीका विविध समस्याका विषयमा छलफल गर्न तयार रहेको बताए ।

प्रशासन शाखा प्रमुख सविता अर्यालले कर्मचारी र जनप्रतिनिधिका गुनासाहरु प्रस्तुत गर्दै कार्यक्रमको सहजीकरण गरेकी थिइन् ।