भरतपुर महानगरले भत्कायो खोला मिचेर बनाएको लायन्स क्लबको भवन

चितवन | भरतपुर महानगरपालिकाले भरतपुर र नारायणगढको बिचोबिच भएर बग्ने पुङ्गी खोला मिचेर बनेका संरचनाहरू भत्काउन सुरु गरेको छ ।
बुधबार बिहान नारायणगढ लायन्सचोकको लायन्स भवनमा महानगरले डोजर लगाएर यसको सुरुआत गरेको छ । महानगर प्रमुख रेनु दाहाल, उपप्रमुख चित्रसेन अधिकारी, प्रमुख जिल्ला अधिकारी, सुरक्षा प्रमुखहरूको उपस्थितिमा डोजरले भवन भत्काउन सुरु गरिएको हो ।
भरतपुर महानगरपालिका–११ भोजाड गणेशथानबाट सुरु भएको पुङ्गीखोला वडा नम्बर ३ र ४ को सिमाना हुँदै नारायणी नदीमा गएर मिसिन्छ । महानगरपालिका नापी अधिकृत विकास देवकोटाका अनुसार साढे ६ किलोमिटर पुङ्गी खोलाको नक्सा अनुसार नाँपजाच पूरा भएको छ । खोला कही तीन चार मिटर र कहीँ १०र१२ मिटर चौडा रहेको उनले बताए । यो भित्र बनेका संरचनाहरू भत्काउन सुरु भएको हो ।
पुङ्गी खोला सौन्दर्यात्मक करिडोर निर्माणका लागि सघन सहरी तथा भवन निर्माण आयोजना चितवन कार्यालयले ६ करोड ६५ लाख रुपैयाँको पूर्वाधारहरू निर्माण गर्दैछ । यसका लागि कार्यालयले साइट क्लियर गरिदिन आग्रह गरेको महानगरले जनाएको छ । त्यसका लागि मापदण्ड विपरीत बनेका संरचनाहरू भत्काउन लागेको महानगरले जनाएको छ ।
गत वर्षको चैत्र ७ मा पुङ्गी खोलाको डिजिटल नक्सा तयार गर्ने निर्णय भएको, प्राविधिक ९अमिन० टोलीले तयार गरेको फिल्ड प्रतिवेदन र नक्साको आधारमा गएको भदौ २८ गते मापदण्ड विपरीतका संरचनाहरू भत्काउने निर्णय भएको पनि महानगरले जनाएको छ । घर टहरा आफैं हटाउन महानगरले साउन १२ गते सार्वजनिक सूचना जारी गरेको थियो । त्यसपछि मात्रै नहटेका संरचना हटाउन सुरु गरेको मेयर रेनु दाहालले बताइन् ।
लायन्स भवनको आफ्नो जग्गा जम्मा तीन धुर मात्रै भए पनि १८८ दशमलब ९४ वर्ग फिटमा बनेको भवनको नक्सापास भएको नदेखिएको हुँदा त्यो भाग खाली गराउन लागेको महानगरले जनाएको छ । लायन्सचोकदेखि खोलाको माथिल्लो क्षेत्रमा कच्ची र पक्की गरेर ४०र५० वटा घरहरू खोला सिमानाभित्र पर्ने महानगरका नापी अधिकृत विकास देवकोटाले जानकारी दिए ।
यस्ता भवनहरू कोही घरधनीले नै भत्काएको र नभत्काएकाहरू हटाउँदै जाने महानगरले जनाएको छ । वडा कार्यालयसमेत खोला सीमाभित्र बनेको भेटिएको छ । लायन्स भवनको स्वामित्व रहेको नारायणगढ लायन्स क्लबका अध्यक्ष राजु पियाले भवन हटाउन २, ३ र ४ नम्बर वडाका लागि सार्वजनिक सूचना निकालेको बताए । यो भवन वडा नम्बर १ मा पर्ने उनले बताए ।
तै पनि हामीले मेयरलाई भेटेर कुरा राखेका थियौं । उहाँले प्राविधिकहरूसँग बसेर छलफल गरौंला भन्नु भएको थियो । तर आज एक्कासी डोजर आएको छ,’ लायन्स क्लब नारायणगढका अध्यक्ष पियाले भने । चार तले सो भवनको भुइँतलामा खोलातर्फको कोठामा ‘प्रकाश अटो’ राखेका सुरेश सापकोटाले दसैंसम्म नभत्काएको भए आफूहरू आफैं हटेर जाने बताए । ‘३० वर्ष पसल राखेको ठाउँमा दसैंका बेला यस्तो गरियो,’ उनले भने ।