बिमा रकम नपाउँदा आँखा अस्पताल चल्न मुस्किल

भरतपुर । समयमै स्वास्थ्य बिमा गरेबापतको रकम नपाउँदा भरतपुर बाइपास रोडमा रहेको आँखा अस्पताललाई चल्न मुस्किल भएको छ ।नेपाल नेत्रज्योति संघ चितवनका पूर्वअध्यक्ष चिजकुमार मास्केले मुस्किलले आँखा अस्पताल चलिरहेको बताए । उनले भने, ‘स्वास्थ्य बिमा बोर्डले बिमाबापतको रकम समयमै नपठाउँदा अस्पताल चल्न मुस्किल भएको छ ।’ नेपाल नेत्रज्योति संघ चितवन एवं भरतपुर आँखा अस्पतालको संयुक्त आयोजनामा भएको लायन्स इन्टरनेसनल डिष्ट्रिक्ट ३२५ आरका गभर्नर सम्मान कार्यक्रममा पूर्वअध्यक्ष मास्केले स्वास्थ्य बिमाको रकम आयो भने अस्पताल चल्न मुस्किल नपर्ने बताए । कार्यक्रममा मास्केले भने, ‘करिब ११ करोड बिमा रकम आउन बाँकी छ जसका कारण अस्पतालले थप योजना पनि बनाउन सकेको छैन, सेवासुविधा थप्न पनि सकेको छैन । अरु त छोडौँ, अस्पताल चल्न नै समस्या परिसक्यो ।’

बोर्डसँग स्वास्थ्य बिमाबापतको भुक्तानी माग गर्दा लामो समयसम्म भुक्तानी नगर्दा अस्पतालको दैनिक सेवा तथा बिरामीको उपचार एवं शल्यक्रियामा प्रयोग हुने औषधि तथा अन्य सामग्री खरिद गर्न रकम अभाव भएको अस्पतालको भनाइ छ ।

नेपाल नेत्रज्योति संघका पूर्वअध्यक्ष प्रभातकुमार जोशीले योजना बनाएर आँखा अस्पताल अघि बढ्नुपर्ने बताए । अस्पताल सञ्चालनमा लायन्स क्लबको ठूलो सहयोग भएको उनले बताए । उनले भने, ‘लायन्स भनेकै आँखा अस्पताल र आँखा अस्पताल भनेकै लायन्सजस्तो भएको छ ।’

कार्यक्रममा लायन्स इन्टरनेसनल डिष्ट्रिक्ट ३२५ आरका गभर्नर दीनानाथ न्यौपाने, फस्र्ट भाइस डिष्ट्रिक्ट प्रभाकर पण्डित, डिष्ट्रिक्ट सेक्रेटरी नीरज श्रेष्ठ, डिष्ट्रिक्ट ट्रेजर शंकर नेपाललाई स्वागत तथा सम्मान गरिएको थियो ।नेपाल नेत्रज्योति संघ चितवन शाखाका सभापति जयराम श्रेष्ठ ‘भैरव’को सभाध्यक्षमा भएको कार्यक्रममा आँखा अस्पताललाई योजना बनाएर अझ अगाडि बढाउने प्रतिबद्धता गरिएको थियो ।

कार्यक्रममा आरका गभर्नर दीनानाथ न्यौपानेले अस्पतालको माग र तत्काल चाहिने आवश्यकतालाई पूरा गर्न लायन्स तत्पर रहेको बताए । उनले भने, ‘लायन्सको काम नै सामाजिक सेवा हो, सामाजिक काम गर्दा नै हामी खुसी हुन्छौँ, आँखा अस्पतालको समस्या समाधानमा लायन्स लागिरहेकै छ, यो कार्यले निरन्तरता पनि पाउँछ ।’ लायन्सले भरतपुर आँखा अस्पताललाई हालसम्म १० करोडको हाराहारी सहयोग गरिसकेको छ ।